🍀 لو سِكت الكلام 🍀 بقلم المبدع الاستاذ ياسر بسيوني
... لو سكت الكلام ...
ياسر بسيوني
،،،،
لو سكت الكلام
مين اللي راح يمنع
كلام جوه القلوب
يوجع وكمان موجوع
ولو اتكلم السكوت
مين اللي راح يسمع
سكوت عمره ما كان
في يوم مسموع
لو نامت العين
مين اللي راح يشفع
لبحر عمره ما كان
فاضي ولا فكر
انه هيتملي بدموع
ويا ايد متكتفة
ملفوفة بالقضبان
تاهت حروفي بين
قلمي وبين اللسان
ويا عقول متحرفة
مهمومة بالنسيان
تاه فكري ما بين
تأييد وبين عصيان
ويا عيون متعصبة
متغطية بالأجفان
ما عدت عارف أنا
شايف ولا من العميان
وكفاية روحنا بقت
تايهه منا من زمان
لا هيّ جوانا ساكنة
ولا ملفوفة بالأكفان
وأنا في السكة ماشي
تايه وحيد حيران
وانا اللي كنت فاكرني
ليا حقوق إنسان
.....
تعليقات
إرسال تعليق