🌺 حاكي المرا 🌺 بقلم النقيب جورج ابو انطون

 بمناسبة يوم المرأة العالمي قصيدة من الأرشيف غير المنشور:

وجود المرا بالبيت... ورده مزهّرة

وجود المرا بالبيت... شمعه منوّرة

وتا تعيش فاضي البال مرتاح الضمير

لازم تكون بتعرف تحاكي المرا

حاكي المرا باللطف بالقلب الحنون

بتكسب رضاها بتغمرك بين الجفون

وتا الدمع ما يقرّب عا موجات العيون

وتا القلب ما يقرّب عا سن الختيرة

لازم تكون بتعرف تحاكي المرا

حاكي المرا بروح التفاهم والحوار

بترتاح...بتعمّر بقلب الدار دار

وتا تضل حدّك لو عليك الدهر جار

وتا يضلّ في عندك ببيتك جوهره

لازم تكون بتعرف تحاكي المرا