🌺 تياب العز 🌺 بقلم النقيب جورج ابو انطون

 قصيدة "تياب العزّ" من أرشيف شعر النقيب جورج ابو انطون:

 

إن جينا الدني نُكشُف حقيقتها 

منشوفهـا مـن أصـل عَجنتهـا

إنجبلِت، وكــان ترابهــا نوعين

وكـلّ البشر خِلقـو عَ صورتهـا

عندَك تراب، بيحترق بخـوّر 

وبيشِّع من قلبو وَميضْ النور

وتراب، ناطِر دعسة الناطور

بينام، وبيوعى عَ دعستها

وفي ناس خلقِت شامخة عَ الكلّ 

وفي ناس رضعِت من حليب الذلّ

وفي ناس قيمتهـا شرَف عَ الحِلّ 

وفي ناس مَــدِّت إيــد قيـمـتـهـا

وعَ الأرض ساعِة ما الحقيقة تحِزّ 

وتبلّش سيوف الكرامــة تهـزّ

في عـالـم، بتلبُس تياب العـزّ 

وفي عـالـم بتشلح كــرامتهـا