🌺 اخرس اعمى اطرش 🌺 بقلم النقيب جورج ابو انطون

 قصيدة "أخرس أعمى أطرش" من أرشيف شعر النقيب جورج ابو انطون :

خلقتني ... إنسان يا ربّي

وزرعت فيّي الروح ل محِبّي

يا ريت كنت خلقتني مهبول

وما أعرف الحَبّي من القِبّي

يا ريت كنت خلقتني مهبول

وما أعرف العالم شو عم بتقول

بدّن لسان البغض عمرو يطول

ويغفى الوفا وتموت ل محَبّي

يا ريتني أخرس بدون لسان

حتى ما إحكي عن جرم إنسان

بايع الذمّي وناكر الوجدان 

ووجّو عن العالم ما بيخَبّي

يا ريتني أعمى بدون عيون

وما شفت يللي بيخرقو القانون

وما شفت إيد الفاسد الملعون

شو عم بتسرق شو عم تعبّي

يا ريتني أطرش بلا أحساس

وما إسمع التخوين والوسواس

من ناس عم تكذب عا كلّ الناس

بالوجّ ضحكي وبالقفا مسبّي