🌺 واقع لبنان 🌺 بقلم النقيب جورج ابو انطون
قصيدة "واقع لبنان" من أرشيف شعر النقيب جورج ابو انطون:
لبـنان صَرلو مـن التـلاتا وأربعيـن
مهَدَّى على رَزمِـة حبال موَّصَلين
عالم بيشِدّو الحَبْل عَ مَيل الشمال
وعالَم بيشِدّو الحَبْل عَ مَيل اليمين
عالَـم بيقولو بهالوطن صِرنا قـلال
بَـدّنا علينا نزيـد نـاس مجَنَّسين
وعـالـم بيقـولـو للعِلِـم نحنـا المثـال
فيـنا حـروف الأبجـديـه متـوَّجيـن
وعـالَم عـمّ يـقـولـو علينـا الإِتِّـكال
نحنـا صبِحْنـا الأكتـرّيـه الفاعليـن
وعالَـم بيقولـو للوطـن نحنـا رجال
بيوم المعارك، للمعارك حاضريـن
وعالَـم عـمّ بتحمُل سلاح بكلّ حال
وعالَم ما بَدّا تشوف عِنّا مسَلَّحين
وفي ناس عمّ بتعيش بمروج الدلال
وفي ناس عا قرش الكرامي عايشين
وفي ناس عمّ تتنعَّـم بكتِـر الغـلال
وفي نـاس لـ اللقمه الطَريّه جايعيـن
وفي نـاس ضد الهيمَنه والاحتـلال
وفي ناس بـِ حِكِـم التعـاون مُؤمْنين
وفي ناس بَدُّن عَلمَنه تفِّك الغلال
وفي ناس بكتاب الدياني مرَسمَلين
شعوب الدِني عم تُنطُر يفِكّو الحبال
تا نصير نحنا ألـف مِلِّـه مفَـرَّقيـن
المفروض نوعى، نقول، بَدّنا الاعتدال
بَدّنا نعيش بفَـِردْ رأي موَّحَـدين
بَدّنـا مـا نُـربُـط حَـالـنـا بـ الإنعـزال
بَدّنـا ما نغـرَق بـِ بحـور الباقيين
بَدّنا الوطن يبقى الوحيد بهالمجال
يِجمَع الشَمْل، يقَـرِّب المتباعدين
ونعود وحـدِة شعب يتحَـدَّى الزوال
والإيـد تشبُك إيـد عا دَرْب الوفــــا
والقلب يغمُر قلب عا مَـرّ السنين
تعليقات
إرسال تعليق