🌺 يا بيتنا 🌺 بقلم النقيب جورج ابو انطون
قصيدة "يا بيتنا" من أرشيف شعر النقيب جورج ابو انطون :
يا بيتنا لـ عَ مدخلَك تيني
لـ وعيْت عَ حُبَّك أوَّل سنيني
ما نسيتَك ولا عنَّك تخلّيت
بَدّي إنت ما تكون ناسيني
ياما تا شوف قناطرك حنيّت
لْـ كانت صوَر للعزّ تعطيني
تا كلّ عقدِه قول عنها بيت
مسلوخ من قلبي وشراييني
ويا جرِّة الفخّار شو استحليت
من تمِّك المليان تسقيني
بتخايلِك عمّ ترشَحي ويا ريت
بجوَاز مَيّي بعد ترويني
ومشتاق شوفَك يا سراج الزيت
اللي كنت تسهَر تا تغفّيني
والصبُح أوعى وإقشعَك فلّيت
وتارِك خيوط النور عَ جبيني
ويا بيتنا لـ منَّك صوَر خبيّت
بعدَك قبالي وعمّ تحاكيني
من المنقَل لـ عَ شِعلْتو تدفّيت
اللي كانت من البَرد تحميني
من الجرن يللي بدقّتو تغنّيت
من المصطبي لـ فيها فرفحيني
من مواسِم المونه لـ أنا حبيّت
مجاديلها اللي متل شعنيني
من سقفَك القرميد هَلْ خلَّيت
عشوشْ الدوَاري بطاقتو زيني
ويا بيتنا اللي بقلبك تربيّت
عايش معَك بالبال خلّيني
تا إذكرك كلّ ما بلاقي بيت
عَ قناطرو معلَّق سقف قرميد
وعَ مدخلو مفرَّخ عِرِق تيني
تعليقات
إرسال تعليق