قصيدة ... كان نفسي اكبر ... بقلم الاستاذ سامح نصر

(كان نفسى أكبر)

ايام زمان
كانت همومي اد سني صغيره...
كوره جديده وبسكلته بجادون مسطره...
ايام زمان
كانت حياتي ملونه...
عيل شقى.. تنطيط ولعب وشيطنه...
كبر الزمان...
وخلاص انا... مبقتش انا...
كبرت همومي... واتغيرت مقاسات هدومي...
مبقتش الاقي الراحه حتى في عز نومي...
فين الصحاب والذكريات...
حبة صور جوه حكايات...
ايام جميله يارتها دامت
يارتني ماحلمت اني اكبر
يارتني ماتمردت يوم على عودي لخضر...
يارتني ماحلمت اني أطول الشمس بكفوفي
كان حلم أغبر...
يارتني ماحلمت اني اشب
يارتني ماتعلمت احب
يارتني مسمعتش كلامهم
لما قالولي في يوم ح تفرج
بس انت اصبر...
يارتني ارجع في يوم عيل صغير
واحلفلكم... اني مقولش في يوم خلاص
أنا نفسي أكبر...

سامح نصر