قصيدة == مين قال == بقلم المبدع الشاعر سعيد عنتر حجاج
مين قال ..
التلج البارد
عمره ماحس
مين قال
ان الصبار فيه شوك
ومراره وبس
التلج ساعات
من صهد القلب يدوب
وساعات بيفرق
بين القسمة والمكتوب
التلج علشان ماهو تلج
بيحس الدفا
مع كل ربيع
ويحب يضيع
فى شعاع الشمس
اللى بيلمحه
فى عيون محبوب
التلج بيقدر يفرق
بين القسمة والمكتوب
والصبار مش بس مرار
ولا شوك متعشق وسط خضار
من غير المر
ازاي هنقول
على طعم الحلو .. الله
من غير الشوك ..
ازاى راح نعرف
معنى الأه
تتصور قلب
بينبض جوه جدار
تتصور شوك
بينبت فيه ازهار
دا الصبار مين زيه
بيفضل اخضر بأستمرار
#سعيد_عنتر_حجاج
#شاعر_الفيس
تعليقات
إرسال تعليق