" الكسوة يا زنود سمرا " بقلم المبدعة الاستاذة ملك محمود الاصفر
قصيدة باللهجة العامية... بعنوان ...
الكسوة يا زنود سمرا...
..................................................
الكسوة سنابل قمح وجناين خضرا
تضحك لنور الشمس ويهفهف عطرا
متل العروس مزينة بتاج القصب
وبإيدا باقة ورد تتباها بسحرا
الكسوة يا رموش مكحلة وغالي مهرا
وجبينا عالي واللولو على صدرا
وشفايف متل الشهد وخدودا حمرا
تمشي وتتمايل والبسمة على ثغرا
الكسوة يا زنود سمرا أقوى من الصوان
بتكسر الصخر وبتزرع الأقحوان
ونفوس طيبة صافية متل البلور
تبني وتعلي وتعمر مجد الأوطان
ورجال بلدنا معدنها معدن دهب
وعندا شهامة ونخوة ورجولة وأدب
بتعمل الخير من قلبا لهالبلد
ومزينة بالعلم وهمتها لهب
وبالحب كسوتنا رح تبقى عمرانة
وبالعز والإيمان رح تبقى منصانة
وبالأخلاق العالية رح تبقى مرفوعة
وجبالا للسمارح تبقى عليانة
ورح يكبر الليمون عنا بجنينتنا
وبشجر الزيتون رح نزرعها حقلتنا
ورح يبقى الياسمين يزين حديقتنا
والعنب متل اللولو رح يضوي بعريشتنا
...........................................................
د. ملك محمود الأصفر
تعليقات
إرسال تعليق